USA, October 21st 2009
ఆహార్యం అభినయం అనుసంధానమై
ఆంధ్ర కూచిపూడి కి హారతి పట్టిన వేళ
కళాపోషకులు కళాప్రియులు
కళామతల్లికి నీరాజనాలర్పించిన వేళ
ముద్దులొలికే చిన్నారుల ముద్రలతో
ప్రథమ పూజితునికి పాదాభివందనం
భాషకు భాష్యం చెప్పిన భావాలు
లయ బద్ధంగా నర్తించిన పాదాలు
శ్రుతి తప్పని స్వరగతులు
హృదయాలను చుంబించిన నృత్య రీతులు
హంస నడకలా ! అలవికాని హోయలా !
నటరాజ నర్తన లోని వివిధ భంగిమలా !
సంస్కృతి కి సజీవ రూపమై
సాంప్రదాయానికి ఒక నిర్వచనమై
సభికులకు సమ్మోహనమై
సంతోషానికి ఆలవాలమై
అనిర్వచనీయమైన అనుభూతి
అదో లోకం లో విహరిస్తున్న రీతి
జన్మనిచ్చినవారి జన్మ ధన్యమైందా
విద్య నేర్పినవారి కృషి ఫలించిందా
అంతర్లీనమైన ప్రతిభకు అంకురార్పణ
అతిధిదేవో భవా అంటూ
చిన్నారులు చేసిన నాట్య ప్రదర్శన
ఇది అమెరికా లో వంశి నాట్య కళాశాల విద్యార్థుల కూచిపూడి నృత్య ప్రదర్శనకు నా హృదయ స్పందన..